Kosova i jep prioritet zhvillimit të pemëtarisë

Sipas zyrtarëve të Ministrisë së Bujqësisë, buxheti i granteve dhe subvencioneve i kësaj ministrie është 46 milionë euro

Institucionet kosovare i kanë dhënë prioritet zhvillimit të bujqësisë, duke ndarë dhjetëra miliona euro subvencione për çdo vit. Ndërsa nga të gjitha kulturat bujqësore, Ministra e Bujqësisë, Pylltarisë dhe Zhvillimit Rural është përqendruar kryesisht në zhvillimin e pemëtarisë.

Sipas zyrtarëve të Ministrisë së Bujqësisë, buxheti i granteve dhe subvencioneve i kësaj ministrie është 46 milionë euro.

Isuf Cikaqi është zyrtar në Ministria e Bujqësisë.

“Në përgjithësi tek të gjithë sektorët ka pas lëvizje, po do ta kisha veçu sektorin e pemëtarisë, e brenda këtij sektori, e kisha veçu nënsektorin e pemëve të imëta e cila ka pas një zhvillim më të hovshëm, sidomos te zgjerimi i sipërfaqeve të reja si me dredhëza, ashtu edhe me mjedër edhe me kultura tjera të pemëve të imëta, edhe me boronicë që ka pas sipërfaqe shumë të pakët e tash me sipërfaqe më të madhe edhe me manaferra etj”, deklaroi ai.

“Sipas analizave që ne kemi bërë sidomos te pemët e imëta, njëri prej faktorëve, se këto hynë shpejtë në prodhim, po edhe kërkesa në treg sidomos për eksport ka qenë në rritje, për pemët e imëta”, tha Cikaqi, citon RTK.

Sipas tij, mbjellja e lajthisë dhe arrës është simbolike deri tani, por që ka filluar të rritet interesimi edhe për to. Mbjellja e tyre, sipas tij, mbështetet vetëm me subvencione, pra me pagesë direkte për hektar të mbjellë.

“Sipas informacioneve, sipërfaqet janë mjaft simbolike, një ndër kulturat që kanë mas paku sipërfaqe, por që janë me interes, viteve të fundit tash ka pa interesim për ngritjen e sipërfaqes sidomos me arra… ne kemi filluar me mbështet sektorin e pemëtarisë, njëkohësisht edhe kulturën e arrës dhe lajthisë, me 400 euro për hektar”, tha Cikqi.

Para disa muajsh, u hap edhe një fabrikë në vend për përpunimin e lajthisë dhe arrës, ku pronarët e saj theksuan se sfida më e madhe është sasia e vogël e kultivimit të këtyre pemëve.