Kosova me ambasadë në Panama

Ministri Hoxhaj tha se hapja e ambasadës në Panama City, është shprehje e vullnetit të Qeverisë së Kosovës për nisjen e një kapitulli të ri të bashkëpunimit bilaterale me Panamanë

Në kuadër të shtrirjes së diplomacisë gjithandej botës, Qeveria e Kosovës ka marrë vendim që të hapë një Ambasadë në shtetin e Panamasë, duke shënuar kështu kancelarinë e parë diplomatike në Amerikën Latine. Themelimin e kësaj ambasade e ka konfirmuar ministri i Jashtëm, Enver Hoxhaj.

Ky i fundit këtë vendim e ka marrë gjatë qëndrimit në Nju Jork, pas takimit me ministrin e Punëve të Jashtme të Panamasë, Fernando Núñez Fábrega.

Në këtë kontekst, Hoxhaj tha se hapja e ambasadës në Panama City, është shprehje e vullnetit të Qeverisë së Kosovës për nisjen e një kapitulli të ri të bashkëpunimit dhe shkëmbimeve bilaterale me Panamanë, si dhe me shtetet e tjera në Amerikën Qendrore dhe Jugore.

Ministri Hoxhaj po ashtu ka kërkuar mbështetjen e Panamasë në përmbylljen e procesit të njohjeve ndërkombëtare të Kosovës.

Ministri panamez i Punëve të Jashtme, Fernando Núñez Fábrega, falënderoi ministrin Hoxhaj për vizitën e zhvilluar në Panama para tre javësh, ku u vendosën edhe marrëdhëniet diplomatike ndërmjet dy shteteve. Fábrega po ashtu vlerësoi progresin në Kosovë, duke shprehur përkrahjen e mëtutjeshme të Panamasë.