Kosova nis procesin e pajtimit me Serbinë

Qeveria e Kosovës parashikon t’i jap fund konfliktit me Serbinë nëpërmjet një traktati të paqes. Me këtë traktat do të rregullohen raportet ndërshtetërore përfshirë edhe kërkimin e faljes nga Serbia

Katërmbëdhjetë vjet pas luftës, Kosova i është rikujton atë periudhë tragjike, duke i vlerësuar dëmet ekonomike, fizike dhe shpirtërore, që konflikti i vitit 1998-1999 i ka lënë në vend. Duke i gjurmuar dëmet e asaj periudhe, institucionet e Kosovës parashikojnë të krijojnë infrastrukturën e pajtimit ndëretnik me Serbinë.

Qeveria e Kosovës, vlerëson se vetëm pas një kohe aq të gjatë, mund të thuhet se janë pjekur kushtet që popujt të ballafaqohen me të kaluarën.

Me këtë rast, të hënën për të parën herë, është mbajtur takimi inaugurues i Grupit Punues për Ballafaqimin me të Kaluarën dhe Pajtim.

“Tema që trajton ky grup punues i Republikës së Kosovës është edhe më e vështirë, ngase ky grup, ka trajtuar dhe tenton ta trajtojë këtë  çështje, që është politikë e Qeverisë së Republikës së Kosovës, për
t’u ballafaquar me të kaluarën për të ndërtuar një vizion për të  ardhmen”, tha zëvendëskryeministri Hajredin Kuçi.

Zëvendësshefi i qeverisë bashkë me shoqërinë civile, organizata vendore e ndërkombëtare dhe donatorë të jashtëm, nisen zyrtarisht procesin e pajtimit.

“Formimi i këtij grupi punues është shtyrë deri në këtë kohë, kur kemi  konsideruar se shoqëria jonë është e aftë për t’u ballafaquar me të kaluarën, ku në një mënyrë ose tjetër, që t’i marrë përsipër rehabilitimin e marrëdhënieve dhe të jetë e gatshme të ballafaqohet me  atë, të kërkoj të vërtetën, të bëjë riparimin e dëmeve të luftës, dhe ashtu sikur kërkon, edhe përshkon përgjegjësi dhe autorësi penale”, tha Kuçi.

Drejtësia e mohuar për dekada dhe shekuj dhe qasja në drejtësi, që nuk ka qenë e mjaftueshme, sipas Kuçit, do të jenë të rregulluara shumë më  mirë se në të  kaurën. Ky grup, siç tha ai, do të jetë një ndër hallkat kryesore të punës së rishikimit të dëmeve dhe pajtimit.

“Natyrisht që edhe raporti me Serbinë, i cili është ende i pazgjidhur,  besoj që e rëndon këtë ballafaqim me të kaluarën. Përkundër kësaj, Qeveria e Kosovës mendon që ne duhet të ballafaqohemi me të kaluarën,
duke marrë parasysh të drejtat dhe pozitën e secilës viktimë të luftës, por në anën tjetër dua të them që nënshkrimi i një traktati të paqes ku do të rregulloheshin raportet Kosovë-Serbi”, tha Kuçi.

Me traktatin e paqes, sipas zëvendëskryeministrit, do të rregullohen  raportet  ndërshtetërore, do të përfshinin edhe kërkimin e faljes nga Serbia edhe kërkimi i kompensimit të dëmeve të luftës.

“Po ashtu kërkimin për çështjen e personave të pagjetur dhe shumë çështje të tjera që ndërlidhen me luftën, do ta ndihmonin në pafundësi edhe krijimin e një ambienti të mirë për t’u ballafaquar me të kaluarën”, konsideron Kuçi.