Kosova pranon themelimin e tribunalit për krime lufte

Prokurori Clint Williamson, i njohur më si hetues i akuzave të Dick Marty, ka kërkuar që Tribunal të jetë jashtë Kosovës dhe të përbëhet vetëm nga ndërkombëtarët

Qeveria e Kosovës ka pranuar formimin e një Tribunali për t’i hetuar dhe gjykuar krimet e luftës në Kosovë, por ka insistuar që ky institucion të funksionojë në Kosovë. Kështu ka deklaruar zëvendëskryeministrin Hajredin Kuçi pas një takimi që ka zhvilluar me prokurorin amerikan Clint Williamson.

Kuçi që është edhe ministër i Drejtësisë, tha se Prishtina zyrtare është e interesuar të ndihmojë drejtësinë dhe të bashkëpunojë me partnerët ndërkombëtarë me BE-në dhe SHBA-në, por gjithnjë duke respektuar juridiksionin e Kosovës, por edhe duke ruajtur siç ka thënë ai, imazhin e luftës së drejtë. 

Sipas tij, Kosova ka ndërtuar mekanizma të mjaftueshëm në fushën e drejtësisë për të trajtuar çdo rast.

“Institucionet e drejtësisë kanë rritur kapacitetet e domosdoshme, qoftë gjyqtarë vendorë dhe ndërkombëtarë, ata të EULEX-it, të cilët me sukses mund të trajtojnë çështjet e drejtësisë dhe për këtë kërkoi që çdo gjykim eventual të mbahet në territorin e Republikës së Kosovës dhe sipas ligjeve dhe juridiksionit të Republikës së Kosovës”, citohet “Zëri” zëvendëskryeministrin Kuçi.

Ndërsa prokurori Williamson, i njohur më si hetues i akuzave të Dick Martyt në “Shtëpinë e Verdhë” ka kërkuar që ky Tribunal të jetë jashtë Kosovës dhe të përbëhet nga hetuesit ndërkombëtarë, krejtësisht jashtë mekanizmave të gjyqësorit vendor, në mënyrë që hetimet të jenë të paanshme..  

“Që të zbulohet e vërteta e akuzave që përmban raporti i Këshillit të Evropës mbi ish-ushtarët e UÇK-së, duhet medoemos që ky tribunal të ketë përbërje ndërkombëtare, pa përfshirjen e gjyqtarëve vendorë. Duhet të jetë i paanshëm dhe i pavarur me përbërje ndërkombëtare”, ka thënë Williamson.

Ndryshe, ndërkombëtarët insistojnë vazhdimisht edhe selia e tribunalit të jetë në një shtet jashtë Kosovës. Por, së fundmi, siç raportohet, ky tribunal t’i ketë dy dhoma, njëra e vendosur në Kosovë dhe tjetra në një shtet tjetër ndërkombëtar.

Dhoma e vendosur në Kosovë të jetë për të hetuar krimet, ndërsa ajo jashtë Kosovës të merret me dëshmitarët e mbrojtur, që për këtë të fundit thuhet se Prishtina është pajtuar.