Kosova shton praninë në Wikipedia

Është përmbyllur gara më e madhe kombëtare e njohur si Wikiakademia e cila synon të pasurojë në mënyrë sa më të dinjitetshme Kosovën në internet

Ministria kosovare e Punëve të Jashtme e ka mbyllur të hënën garën më të madhe kombëtare “Wikipedian”, duke zgjedhur fotografitë, muzikën dhe shkrimin më të mirë për arkeologjinë kosovare. Ky konkurs, sipas MPJ-së, do të mundësojë pasqyrim real të Kosovës në internet.

Kjo garë është organizuar në kuadër të Strategjisë për Diplomaci Digjitale të Ministrisë së Jashtme dhe ka mundësuar pjesëmarrjen e mbi 200 garuesve të cilët janë shpërblyer me një fond total prej 10,000 euro shpërblime.

Wikiakademia është një projekt i trajnimit të të rinjve për përdorimin e enciklopedisë më të madhe në botë Wikipedia, që ka pasur për synim shtimin e informatave për Kosovën në këtë resurs të vlefshëm informativ.

Gara e Wikiacademy-s është iniciuar nga Ministria e Punëve të Jashtme e Republikës së Kosovës, në bashkëpunim me Fondacionin IPKO, shoqatën kosovare “open source FLOSS” dhe Ambasadën e Mbretërisë së Norvegjisë në Kosovë.

“Nga 57 artikuj të ri për Kosovën dhe veçoritë e saj, nga 3 fituesit kryesorë, ishin artikulli mbi Teknologjinë Informative të Kosovës nga Dardan Ahmeti, pastaj Muzikën Klasike në Kosovë nga Liburn Jupolli, Edona Vatoci dhe Mic Sokoli, ndërsa fituesi ishte artikulli i ri për Arkeologjinë e Kosovës nga Atdhe Prelvukaj”, thuhet në njoftim.

Po ashtu në këtë garë u përzgjodhën dhe fotot më të mira për Kosovën në Wikipedia,  ku 3 fituesit kryesorë u shpallën: Bujar Gashi, Arben Llapashtica dhe Arben Islami.

Petrit Selimi, Zëvendës Ministër i Jashtëm dhe iniciator i projektit, deklaroi se një nga problemet kryesore me të cilat përballet diplomacia kosovare është edhe mungesa e informatave nga Kosova në internet, jo vetëm politike por edhe të dhëna për kulturën, artin, ekonominë dhe jetën e përditshme.

Ambasadori Jan Braathu i Norvegjisë tha se ky është ndër projektet më të qëlluara që kanë bashkëfinancuar, duke inkurajuar participuesit të mbesin edhe një kohë të gjatë në Wikipedia për t’i kundërshtuar propagandistët që nuk ia duan të mirën Kosovës.

Projekti Wikiacademy synon të jetë angazhim i përjetshëm për të rritur sa më shumë informatat nga Kosova, ndërsa Strategjia për Diplomaci Digjitale e Kosovës është përzgjedhur si e katërta më e mira në botë nga revista Yeni Diplomasi e Turqisë.