Kosova, „vetëm“ edhe 164 kushte për liberalizim të vizave

Luftimi i korrupsionit është identifikuar si kushti kryesor që duhet ta përmbushë Kosova, në kompensim të heqjes së vizave.

Ka kaluar një vit nga afati që kishte dhënë kryeministri Thaçi për të filluar lëvizja pa viza e qytetarëve të Kosovës në zonën Shengen. Ai kishte premtuar që kjo do të ndodhte brenda 15 muajve të mandatit aktual të qeverisë që drejton. E Qeveria e tij akoma nuk ka përmbushur edhe 164 veprime, me të cilat i kushtëzohet Kosovës liberalizimi i vizave, shkruan Koha ditore.

Veprimet janë të shpërndara në pesë blloqe, ndërsa 66 sosh janë paraparë të ndërmerren në fushën e sigurisë dhe të rendit publik. Të gjitha është paraparë të përmbushen brenda 2013-s.

Luftimi i korrupsionit është identifikuar për të gjitha hallkat, si kushti kryesor që duhet ta përmbushë Kosova, në kompensim të heqjes së vizave.

Është paraparë të hartohen ligje të reja e të ndryshohen dhe të plotësohen ligje në fuqi, të hartohen shumë akte nënligjore, të ndërmerren aktivitete hetimore kundër korrupsionit, të përgatiten statistika që vërtetojnë përkushtimin për ta luftuar këtë praktikë, por edhe të bëhen trajnime për të ngritur vetëdijen kundër korrupsionit.