Kosovarët më shumë e shfrytëzojnë aeroplanin se trenin

Në tremujorin e tretë të këtij viti, 66 mijë kosovarë e kanë shfrytëzuar trenin për udhëtim brenda vendit, ndërsa 541 mijë kanë udhëtuar me aeroplan

Qytetarët e Kosovës më shumë e kanë shfrytëzuar aeroplanin për flurime jashtë vendit se sa udhëtimet me tren brenda Kosovës. Madje dallimi ne tremujorin e tretë të këtij viti, është dukshëm më i lartë, duke kaluar shifrat në 8 ose 9 fish më shumë me aeroplan se sa me tren.

“Në tremujorin e tretë të vitit 2015, numri i pasagjerëve, që e kanë shfrytëzuar trenin, si mjet udhëtimi është 66 mijë pasagjerë. Krahasuar me tremujorin e tretë të vitit 2014, numri i udhëtarëve është ulur për 12.7 për qind”, thuhet në raportin e Agjencisë së Statistikave të Kosovës (ASK) publikuar sot rreth Statistikave të Transportit dhe Telekomunikacioni.

Ky publikim përfshin statistikat për Transportin Ajror, Hekurudhor dhe Postë Telekomunikimin.

“Numri i udhëtarëve që e kanë shfrytëzuar aeroplanin, si mjet transporti, është rreth 541 mijë. Në raport me tremujorin e njëjtë të vitit të kaluar kemi rritje për 14.6 për qind’, thuhet në raportin e ASK-së. Numri i fluturimeve gjatë tre muajve, sipas ASK-së, është 2150 ose 11 për qind më shumë se vitin e kaluar.

Ndryshe, në territorin e Kosovës janë gjithsej 333 kilometra binarë hekurudhorë për transport dhe 110 binarë të udhëtarëve, derisa qarkullojnë 8 lokomotiva disel, të cilat bartin 27 vagonë, 9 të udhëtarëve dhe 18 për bagazh. Transporti i mallrave me tren në tremujorin e tretë të vitit 2015 është 173 mijë tonë, ose ka një ulje për 45 për qind krahasuar me të njëjtën periudhë të vitit të kaluar.