Kosovarët më shumë udhëtojnë me aeroplan se me tren

Kosovarët, pesë herë më shumë udhëtojnë me aeroplan se sa me tren. Sipas statistikave, gjatë tre muajve të fundit, 332 mijë veta kanë udhëtuar me aeroplanë, 66 mijë me tren

Brenda tre muajve të fundit (tetor, nëntor, dhjetor) të vitit të kaluar, rreth 332 mijë qytetarë e kanë shfrytëzuar Aeroportin Ndërkombëtare “Adem Jashari” në Prishtinë për udhëtim. Kjo shifër, tregon se në fundvit numri i qytetarëve që shfrytëzojnë aeroplanin si mjet transporti, është rritur për 4.47 për qind.

Këto të dhëna i ka publikuar sot Agjencia e Statistikave të Kosovës (ASK) në raportin: “Statistikat e Transportit dhe Telekomunikacionit”, me të dhëna mbi Transportin Ajror, Hekurudhor, dhe Postë Telekomunikimin për tremujorin e katërt  2015.

“Numri i fluturimeve në tremujorin e katërt të vitit 2015 ishte 1387, ose 0.22 për qind më pak se në tremujorin e njëjtë të vitit të kaluar 2014”, thuhet në raportin e ASK-së. Sipas këtyre statistikave, kosovarët vazhdojnë ta shfrytëzojnë pesë herë më shumë transportin ajror se atë hekurudhor.

Në territorin e Kosovës, sipas ASK-së, janë gjithsej 333 km binarë hekurudhorë për transport dhe 110 privatë, derisa qarkullojnë 8 lokomotiva disel, të cilat bartin 27 vagonë, 9 të udhëtarëve dhe 18 për bagazh.

“Në tremujorin e katërt të vitit 2015, numri i pasagjerëve që kanë shfrytëzuar trenin si mjet udhëtimi është 66 mijë, ku krahasuar me tremujorin e katërt të vitit 2014 numri i udhëtarëve është ulur për 19.74 për qindË, thuhet në raport.

Ndërsa transporti i mallrave me tren në tremujorin e katërt të vitit 2015 kishte shënuar rritje. Sipas Agjencia e Statistikave të Kosovës në tremujorin e fundit ishte 159 mijë tonë, ndërsa në raport me tremujorin e njëjtë të vitit të kaluar, ka pasur ngritje për 9.97 për qind.