Kosovë-Kroaci, marrëveshje për verërat

Ivana Petriq, nga Instituti i Vreshtarisë dhe Verëtarisë në Kroaci, ka thënë se kjo marrëveshje do të ju ndihmojë të dyja shteteve për një sistem më të mirë të verëtarisë

Autoritetet e Kosovës dhe ato të Kroacisë kanë nënshkruar sot në Rahovec një marrëveshje bashkëpunimi për sistemin e kontrollit të kualitetit të verës. Marrëveshja është nënshkruar nga përfaqësuesit e Departamentit të Vreshtarisë dhe Verëtarisë së Kosovës dhe ata të Institutit të Vreshtarisë dhe Verëtarisë së Kroacisë.

Me nënshkrimin e kësaj marrëveshje, siç u tha, po krijohen mundësitë edhe për ndërlidhjen e sistemeve ekzistuese dhe krijimin e një platforme të përbashkët për kontrollin e produkteve bujqësore, sigurinë e konsumatorëve dhe sistemin e subvencionimit.

Drejtori i Departamentit të Verëtarisë dhe Veterinarisë së Kosovës, Bekim Hoxha tha se me këtë marrëveshje parashihet edhe shtimi i mundësisë së bashkëpunimit si dhe përgatitja e programeve të përbashkëta për fondet dhe projektet nga Bashkimi Evropian.

E po ashtu marrëveshja, sipas tij, parasheh edhe këmbimin e ekspertëve dhe shkëmbimin e përvojave në krijimin e praktikave më të mira në lidhje me menaxhimin dhe mirëmbajtjen e kadastrit të vreshtave dhe kontrollit të kualitetit të verës.

“Ministria e Bujqësisë, këtë vit për herë të parë sivjet e ka lansuar Sistemin për Menaxhimin e Cilësisë dhe Kontrollit të verës, në të cilin vreshtarët dhe kompanitë prodhuese të verës dhe prodhimeve tjera nga rrushi e vera janë të obliguar të bëjnë deklarimin përfundimtar të rendimentit të rrushit të vjelur”, deklaroi Hoxha.

Në këtë drejtim eksperienca dhe përvoja e Kroacisë, sipas tij, është e domosdoshme për Kosovën.

Ndërsa, Ivana Petriq, nga Instituti i Vreshtarisë dhe Verëtarisë në Kroaci, ka thënë se nënshkrimi i kësaj marrëveshje do të ju ndihmojë të dyja shteteve shkëmbimin e përvojave në sistemin e vreshtarisë dhe verëtarisë.

Ky deklarim i vjeljes së rrushit bëhet në Departamentin për Vreshtari dhe Verëtari në Rahovec, nga 7 shtatori i këtij viti, deri më 10 dhjetor po të këtij viti.