Lajme

Kosovë, nis studimi i tokës

Ky projekt që është financuar nga Bashkimi Evropian, do të nxjerr të vërtetën nëse toka e Kosovës është e helmuar apo e pastër

E mërkurë, 2 Tetor 2013 - 20:58 albinfo.ch

Zyra e Bashkimit Evropian në Kosovë në bashkëpunim me organizatën gjermane GIZ dhe atë poloneze NIRAS, kanë nisur projektin për të studiuar ndotjen e tokës 　bujqësore të Kosovës. Ky projekt do të nxjerr të vërtetën nëse toka e Kosovës është e helmuar apo e pastër. 　

Projekti është financuar nga Bashkimi Evropian për studimin e tokës bujqësore në Kosovë (ALPS). Ky studim nisë pasi që disa muaj më parë është shkruar në mediet e Prishtinë, duke u bazuar në hulumtimet ndërkombëtare, se toka e Kosovës është e kontaminuar.

Zëvendësministri i Mjedisit dhe Planifikimit Hapësinor, Ferat Shala përshëndeti fillimin e këtij projekti, duke e cilësuar shumë të rëndësishëm sa i përket të dhënave që do të dalin nga ky studim rreth shfrytëzimit dhe ruajtjes së qëndrueshme të tokës bujqësore.

“Besoj se ky projekt do të nxjerrë të dhëna të vlefshme dhe të besueshme për të përcaktuar së në çfarë gjendje është toka jonë bujqësore dhe në çfarë mase mund të jenë të ndotura pjesë të ndryshme të saj”, deklaroi Shala.

Ndërsa Christof Stock, nga Zyra e Bashkimit Evropian në Kosovë, tha se objektivë kryesore e këtij projekti është mbështetja e Qeverisë së Kosovës, për të përmirësuar sistemin e menaxhimit të tokave bujqësore.

Ai konsideroi se projekti ALPS përfshinë edhe një komponent shumë të rëndësishëm, atë të studimit të detajizuar të tokës në 17 komuna, për të vlerësuar prezencën e metaleve të rënda në produktet bujqësore dhe ushqimore, dhe vlerësimin e mundësisë së përhapjes së këtyre ndotjeve në trupin e njeriut.

Qëllimi kryesor i projektit ALPS, është mbështetja e institucioneve qeveritare në drejtim të realizimit të vlerësimit të ndotjes së tokës bujqësore, si element shumë i rëndësishëm për zbatimin e legjislacionit vendor lidhur me menaxhimin e tokës bujqësore dhe mbrojtjen e mjedisit.

Ndryshe, disa herë janë dhënë dilemat se toka bujqësore në Kosovë është infektuar në masë të madhe nga lufta e fundit dhe përdorimi i armeve luftarake. Ky studim do të nxjerr të vërtetën, nëse toka është e pastër, apo ka uranium të varfëruar dhe elemente të tjera kimike që janë kancerogjene.　