Kosovë: Policia konfirmon vrasjen e njërit prej të dyshuarve për grabitjen në Suharekë, arrestohen katër të tjerë

Policia e Kosovës, përmes një komunikate për media ka konfirmuar se gjatë aksionit të sotëm është vrarë njëri prej të dyshuarve për grabitjen e armatosur, të kryer ditë më parë në një argjendari në Suharekë, teksa u njoftua se janë arrestuar edhe katër persona të tjerë.

Një tjetër i dyshuar gjendet ende në kërkim policor, përcjell albinfo.ch.

Sipas njoftimit, gjatë zhvillimit të operacionit policor, një i dyshuar ka shtënë me armë zjarri në drejtim të zyrtarëve policorë, duke ua rrezikuar drejtpërdrejt jetën e tyre, me ç’rast është plagosur një zyrtar policor.

“Zyrtarët policorë në vetëmbrojtje janë detyruar të përdorin forcën proporcionale, duke arritur të neutralizojnë një të dyshuar, përderisa katër të dyshuar të tjerë janë arrestuar. Deri më tani numri i të arrestuarve ka shkuar në shtatë persona, një i neutralizuar dhe një tjetër ende gjendet në kërkim policor”, ka njoftuar policia.

Tutje thuhet se zyrtarit policor i është ofruar ndihma mjekësore në SHSKUK, ku sipas informatave të para nga mjekët kompetentë, i njëjti është jashtë rrezikut për jetën.

“Vlen të potencohet se personat e dyshuar kanë të kaluar kriminale, me dyshimet e bazuara për përfshirje në vepra penale, si: vrasje, grabitje, vjedhje e rëndë, sulm, kanosje, lëndim trupor, detyrim, armëmbajtje pa leje etj. Të gjitha veprimet e mëtejme policore do të ndërmerren në bashkëpunim dhe koordinim me prokurorinë kompetente”, thuhet në njoftim.

Tutje, Policia e Kosovës gjithashtu ka deklaruar se si rezultat i hetimeve të pandërprera fillimisht ishin arrestuar tre persona të dyshuar për ndihmë në kryerje të veprës penale të grabitjes, përderisa hetimet drejt identifikimit dhe ndriçimit të rastit kanë vazhduar deri më sot.

“Pas hetimeve intensive dhe mbledhjes së dëshmive, sot në Prishtinë, Fushë-Kosovë dhe Carralevë është realizuar operacioni policor, i cili ka përfshirë kontrollin në shtatë lokacione të ndryshme, me qëllim të identifikimit dhe arrestimit të personave të dyshuar”, bën të ditur policia.