Kosovë: Problem me qentë endacakë, sot e pësoi edhe djali i deputetes kosovare

Sot, deputetja e Lëvizjes Vetëvendosje, Mimoza Kusari Lila, ka njoftuar se djali i saj 9-vjeçar është sulmuar nga qentë endacakë

Kosova vazhdon të përballet me problemin e menaxhimit të qenve endacakë. Jo rrallë nga ta kanë pësuar qytetarë, e madje edhe fëmijë.

Sot, deputetja e Lëvizjes Vetëvendosje, Mimoza Kusari Lila, ka njoftuar se djali i saj 9-vjeçar është sulmuar nga qentë endacakë, shkruan Albinfo.ch.

“Sot cak i një sulmi nga qenët endacakë ishte djali ynë Edoni, 9-vjeçar, në afërsi të shkollës së tij “Ismail Qemali” në Bregun e Diellit në Prishtinë. Sulmi ndodhi në mes të ditës, ora 1:15 mesditë, derisa djali ishte duke hyrë në oborrin e shkollës. Reagimi i mësuesës, drejtoreshës dhe pastaj emergjencës ka qenë i menjëhershëm dhe pas intervenimit kirurgjik (qepjes) në Emergjencë, Edoni është duke u trajtuar në shtëpi. I falenderoj me radhë të gjithë që sot ishin me Edonin pas sulmit që i ndodhi”, shkruan Kusari-Lila.

Sipas saj, me këtë problem përballen edhe qindra familje në Kosovë.

“Problemi që sot preku edhe familjen tonë, ka prekur qindra familje në mbarë Kosovën, jam shumë e vetëdijshme për këtë. Është i domosdoshëm trajtimi përmbajtësor i problemit të qenve endacakë. Problemi i rrugës nuk mund të jenë qentë endacakë, por mënyra se si njerëzit i trajtojnë ata”, thotë ajo, përcjell Albinfo.ch.

---