Kosovë: Prokuroria jep detaje për vdekjen e ukrainases në autostradë

pixabay

Prokuroria Themelore në Ferizaj ka dhënë detaje lidhur me vdekjen e shtetases ukrainase, e cila u gjet pa shenja jete në autostradën Ferizaj-Prishtinë mbrëmjen e së mërkurës, përcjell albinfo.ch.

Sipas Prokurorisë, rasti është duke u hetuar si “aksident trafiku” me fatalitet.

Viktima me iniciale O.K. u gjet e vdekur rreth orës 19:30 në autostradë.

“Hetuesit Rajonalë të Policisë së Kosovës, në koordinim me Prokurorinë e Shtetit kanë dalë në vendin e ngjarjes dhe nga ekipi mjekësor është konstatuar vdekja e saj. Prokuroria me të gjitha institucionet e tjera relevante janë duke punuar për zbardhjen e rrethanave të kësaj vdekjeje, dhe rasti është duke u hetuar në drejtim të veprës penale “Aksident trafiku” me fatalitet. Me urdhër të Prokurorit të Shtetit, trupi i pajetë i viktimës është dërguar për obduksion në Institutin e Mjekësisë Ligjore (IML) në Prishtinë”, thuhet në komunikatën e dërguar për media.