Kosovë: Rritja e tarifave të energjisë elektrike pritet të rritë çmimet tjera

(KEYSTONE/Christian Beutler)

Me shtrenjtimin e energjisë elektrike në Kosovë po pritet edhe shtrenjtimi i produkteve të tjera ushqimore. Për familjen 4-anëtarëshe Makovci nga Millosheva – Komuna e Obiliqit – një rritje e re e çmimeve të produkteve do të ishte vështirë e përballueshme.“Nuk e di si do t’ia bënim… Do të blejmë gjëra më pak. Edhe ashtu janë shtrenjtë”, thotë kryefamiljarja Sherifja për Radion Evropa e Lirë, përcjellë albinfo.ch.

Të ardhurat mujore nuk kalojnë mbi 400 euro, pasi i punësuar është vetëm djali i saj i cili është shofer taksie. “Nëse para më shumë se një viti me 100 euro kam blerë disa nga produktet për një muaj… tani ato janë dyfish më shtrenjtë. Me shumë vështirësi e mbyllim muajin. Kemi shpenzime jo vetëm për ushqime, por edhe për rrymën, ujin, mbeturinat e të tjera”, shprehet ajo, përcjellë albinfo.ch.

Kosova e ka mbyllur vitin 2022 me normë mesatare të inflacionit gati 12 për qind. Por, një rritje të re të çmimeve janë duke e paralajmëruar përfaqësuesit e bizneseve dhe pronarët e kompanive prodhuese për shkak të rritjes së çmimit të energjisë elektrike.

Nga 1 prilli, në Kosovë kanë hyrë në fuqi tarifat e reja të energjisë elektrike me rritje prej 15.4% për të gjitha kategoritë e konsumatorëve.