Kosovë-Shqipëri, patrullime të përbashkëta në “Rrugën e Kombit”

Policia e Shqipërisë dhe ajo e Kosovës do të patrullojnë bashkërisht nëpër “Rrugën e Kombit” gjatë tre muajve të verës. Marrëveshje është bërë për të parandaluar kundërvajtjet administrative

Policia e Kosovës ka nënshkruar një memorandum bashkëpunimi me Policinë e Shqipërisë për të patrulluar bashkërisht nëpër “Rrugën e Kombit” gjatë tre muajve të verës. Kjo marrëveshje është bërë për të parandaluar kundërvajtjet administrative dhe për të shpëtuar jetët nëpër rrugë.

Marrëveshje është nënshkruar në Prizren nga Shpend Maxhuni, drejtor i Përgjithshëm i Policisë së Kosovës dhe Haki Çako, drejtori i Policisë së Shtetit të Shqipërisë. Ky memorandum, i cili përfshinë periudhën kohore 1 korrik 2016-31 gusht 2016, shton organizimin e shërbimeve të përbashkëta të policimit rrugor në Republikën e Shqipërisë.

“Qëllimi  i këtij memorandumi është vendosja e bashkëpunimit konkret në fushën e parandalimit të kundërvajtjeve administrative, për rritjen e efikasitetit të luftës ndaj humbjes së jetëve njerëzore në aksidentet rrugore dhe zbatimin me rigorozitet të legjislacionit rrugor, për krijimin e një ambienti më të sigurt për të gjithë qytetarët dhe përdoruesit e rrugës që qarkullojnë në akset rrugore që lidhin dy vendet”, thuhet në njoftim.

Me rastin e nënshkrimit të këtij memorandumi të dy drejtorët, Maxhuni dhe Çako vlerësuan marrëdhëniet e shkëlqyeshme të dy policive, jo vetëm në fushën e policisë rrugore, por edhe në të gjitha format tjera të luftimit të kriminalitetit.

Gjithashtu, gjatë këtij takimi të dy drejtorët u pajtuan që të krijohen kushte lehtësuese për qytetarët e të dyja vendeve për përdorimin e pikave kufitare dhe atyre turistike gjatë realizimit të udhëtimeve të tyre. Turni i parë i zyrtarëve policorë të Policisë së Kosovës që do të udhëtojnë në Republikën e Shqipërisë bëhet nesër më 1 korrik.