Kosovë-Shqipëri, treg i përbashkët turistik

Kosova dhe Shqipëria nënshkruan një marrëveshje për turizmin, e cila krijon një treg të përbashkët turistik

Autoritetet e Kosovës dhe ato të Shqipërisë kanë nënshkruar të enjten në Tiranë një marrëveshje bashkëpunimi në fushën e turizmit. Kjo marrëveshje parashikon që të dy vendet, Prishtina dhe Tirana të promovojnë turizmin e përbashkët malor dhe atë bregdetar.  

 

Marrëveshja e cila shpreh vullnetin e përbashkët të dy qeverive realizuar në takimin e Prizrenit më 11 janar, u nënshkrua nga ushtruesi i detyrës së ministrit të Tregtisë dhe Industrisë së Kosovës, Berndar Nikaj dhe ministrja e Zhvillimit Urban dhe Turizmit të Shqipërisë, Eglantina Gjermeni.

 

Të dy palët vlerësuan si shumë të rëndësishëm bashkëpunimin në fushën e turizmit, si një sektor potencial për zhvillimin e ekonomisë në të dy vendet.

 

Për përfaqësuesin e Kosovës, Bernard Nikaj, kjo marrëveshje i hap rrugën vizitave të përbashkëta në destinacione  turistike të të dyja shteteve.

 

“Me këtë marrëveshje do të vendosë në një kornizë institucionale e bashkëpunimit, i cili shumë shpejt do të konkretizohet me projekte të përbashkëta. Së bashku jemi më të fortë”, deklaroi Nikaj.

 

Ndërsa ministrja e Zhvillimit Urban dhe Turizmit të Shqipërisë, Eglantina Gjermeni tha se synimi ynë kryesor është krijimi dhe zhvillimi i paketave të përbashkëta turistike, si e vetmja mundësi për të qenë konkurrues në tregun rajonal dhe më gjerë.

 

“Ne kërkojmë të zgjerojmë veprimtarinë e operatorëve turistikë të të dy vendeve dhe të shtojmë numrin e turistëve, duke ju siguruar kushte dhe standarde më të mira”, u shpreh ajo.

 

Palët ranë dakord të punojnë bashkërisht për rritur numrin e turistëve mes dy vendeve, duke siguruar praktika të thjeshta ndërkufitare përgjatë gjatë vitit, si dhe lëvizjen e vizitorëve nga njëri shtet në tjetrin, në përputhje me standardet kombëtare dhe ndërkombëtare. 

---