Vdes shtatzëna e infektuar me koronavirus

Sot gjatë orëve të para të mëngjesit në mjekimin intensiv të Klinikës Infektive ka ndërruar jetë pacientja shtatzënë me vendbanim në Gjakovë (1980) e diagnostikuar me Covid-19.

Lajmin e ka konfirmuar Klinika Infektive.

“Klinika Infektive e QKUK-së njofton se gjatë orëve të para të datës 21. 04. 2020 në mjekimin intensiv të kësaj klinike ka ndërruar jetë pacientja V.P. me vendbanim në Gjakovë (1980) e diagnostikuar me Covid-19. E njëjta ishte shtatzënë dhe po trajtohej në mjekimin intensive të klinikës që prej datës 15 prill 2020”, përfundon njoftimi.

Gruaja shtatzënë kishte pasur përkeqësime prej kur ishte shtruar në Infektivë, derisa nuk është bërë e ditur për gjendjen e foshnjës.

Deri tash në Kosovë janë të infektuar 598 persona, derisa 16 kanë vdekur dhe 123 janë të shëruar.

Sipas QKUK-së, kjo është vdekja e 13-të e pacientëve me Covid-19 në këtë klinikë dhe e 16-ta në nivel të shtetit, përcjell Albinfo.ch.