Kosovën e ka njohur Republika e Malit

Republika e Malit bëhet vendi i 92-të, i cili njeh Republikën e Kosovës

Zëvendëskryeministri Behgjet Pacolli deklaroi të shtunën se Republika e Malit e ka njohur Republikën e Kosovës duke u bërë shteti i 92-të i Organizatës së Kombeve të Bashkuara që ka njohur shtetin më të ri në Evropë.

Në një konferencë për medie, zëvendëskryeministri Pacolli prezentoi edhe notën verbale të nënshkruar nga presidenti i Malit, Dioncounda Traore  nëpërmjet të cilës ky shtet renditet në mesin e shteteve që deri më tani kanë njohur Republikën e Kosovës.

Sipas Pacollit, tanimë në rajonin e Afrikës perëndimore, ka mbetur vetëm edhe Togo që ende nuk e ka njohur Kosovën. “Javën e ardhshme unë do të zhvilloj një vizitë në këtë shtet, dhe besoj se shumë shpejt gjithçka do të përmbyllet”, ka deklaruar zëvendëskryeministri Pacolli.

Përveç Togos, Pacolli ka paralajmëruar vizita edhe në disa shtete të tjera të Afrikës. Kontinenti i zi, ndërkaq ka qenë në agjendë të Pacollit gjatë gjithë këtij viti. Ai ka vizituar Afrikën tri herë gjatë periudhës njëvjeçare, ndërsa ka sjellë disa njohje. Mirëpo disa nga njohjet që i ka proklamuar Pacolli, asnjëherë nuk janë konfirmuar.

Megjithatë detyra e Pacollit brenda Qeverisë Thaçi ka qenë lobimi dhe sjellja e sa më shumë njohjeve.