Kritikohet protesta me elemente fetare në Shkup

Tirana dhe Prishtina kanë kritikuar protestën e së premtes në Shkup për shkak ngjyrimit fetar sesa etnik dhe kombëtar të shqiptarëve

Një zyrtar i lartë i Qeverisë Shqiptare i tha agjencisë së lajmeve INA se përshëndesin format e tilla të shprehjes së protestës dhe revoltës përmes protestave demokratike, por jo inflirtimi i elementeve fetare.

“Problemet e shqiptarëve në Maqedoni janë të karakterit etnik dhe politik, dhe s`ka hapësirë apo probleme fetare. Vetë mënyra e shprehjes së pakënaqësisë me thirrje fetare dhe flamuj fetar, krijon një huti dhe devijon problematikat shqiptare që janë më se reale, dhe kështu përfiton pala tjetër, duke e karakterizuar protestës si fetare dhe islamike”, deklaroi për INA, zyrtari i lartë i Qeverisë shqiptare në Tiranë.

Ndërkohë, pakënaqësi dhe reagime të njëjta janë shfaqur edhe në Prishtinë, ku është kritikuar forma e protestës dhe elementet e saj.

Përmes rrjeteve sociale, shumica e shqiptarëve kanë shprehur kritika për formën dhe keqpërdorimin e protestës nga ana e disa elementeve dhe individëve me prapavijë fetare.

Ndërkohë, shumica e komenteve të qytetarëve tek INA kanë shkruar se protesta e sotme e organizuar me dinjitet të lartë dhe porosi e ikonografi kombëtare është një model për të shprehur revoltën dhe mesazhet kundër diskriminimit dhe për realizimin e kërkesave të shqiptarëve edhe në Maqedoni.