Kroacia nuk lejon kalimin e kosovarëve me vizë Shengeni

Nëse në vizën e Shengenit, në pasaportat kosovare, potencohet ndalesa për shtetet që nuk e kanë njohur Kosovën, ata nuk mund të kalojnë transit as nëpër Kroaci

Në verën e vitit 2012, para se të udhëtoja me automobil nga Zvicra për në Kosovë e kisha parasysh kalimin transit nëpër Kroaci, shtet ky që aplikon viza për kosovarët. Duke pasur vizën „Shengen C“ konsultova Konsullatën Kroate në Cyrih për procedurën e kalimit transit. Përgjigja ishte: ”Nëse keni një vizë „Shengen C“ (Multiplay), atëherë mund të kaloni nëpër Kroaci pa pasur nevojë për një vizë nga shteti kroat.

Me këtë informacion u nisa edhe sivjet, më 2 mars 2013, nga Zvicra për në Kosovë. Por me të arritur në kufirin kroat, policia kufitare më ktheu që të marr një vizë në Ambasadën kroate në Lubjanë. Arsyetimi ishte se që nga shkurti ka hyrë në fuqi ndalesa për kosovarët që nuk posedojnë vizë kroate, pavarësisht nëse ata kanë një vizë „Shengen C“.

Sqarimi i polices kufitare, znj. Marija Horvat ishte se nëse në vizën e Shengenit, në pasaportat kosovare, potencohet ndalesa për në shtetet që nuk e kanë njohur Kosovën, si p.sh. Spanja, Sllovakia, Greqia etj., atëherë këta persona nuk mund të kalojnë transit as nëpër Kroaci.

Prandaj, duke pasur parasysh pamundësinë e sigurimit të një vize transitore për shtetin kroat në kufi si dhe peripecitë e sigurimit të një vize nga ambasada kroate në njërin nga shtetet përreth, njoftoj bashkatdhetarët e mi që të jenë më preventivë, dhe vizën ta sigurojnë me kohë, duke mos u bazuar në vizën „Shengen C“.

Ky shkrim le të jetë edhe një lutje për përfaqësuesit konsullorë të Kosovës në shtetet respektive që të negociojnë me kolegët e tyre për lehtësirat në kalimin transitor, ngase është e pamundur që një kosovar ta marrë një vizë të Shengenit e të mos figurojë ndalesa për shtetet që ende nuk e kanë njohur Kosovën.

Xhevdet Kallaba