Kryediplomatja gjermane të enjten viziton Ballkanin

Ministrja e Jashtme gjermane, Annalena Baerbock, do të udhëtojë në Ballkan më 5 tetor, në mes të tensioneve në rritje mes Serbisë dhe Kosovës.

Baerbock do të flasë me liderët nga Serbia dhe Kosova dhe do të vazhdojë t’u kërkojë të dyja palëve të depërshkallëzojnë konfliktin në margjinat e një takimi në Shqipëri të ministrave të jashtëm nga Ballkani Perëndimor, tha një zëdhënës i Ministrisë së Jashtme gjermane, shkruan REL, përcjell Albinfo.ch.

Zëdhënësi i Baerbock tha se situata në rajon ishte “pa dyshim shqetësuese”. Takimet në Shqipëri janë pjesë e Procesit të Berlinit, i cili filloi në vitin 2014 për të nxitur bashkëpunimin mes gjashtë vendeve të Ballkanit Perëndimor./Albinfo.ch