Kryemadhi e Basha thonë se kanë objektiv rrëzimin e Ramës

Kryetarja e Lëvizjes Socialiste për Integrim, Monika Kryemadhi u shpreh se partia që ajo drejton dhe Partia Demokratike do të ndërtojnë një platformë politike me objektiv e vetëm rrëzimin e Edi Ramës.

Sa i përket protestës së paralajmëruar së bashku me PD, Kryemadhi u shpreh se ende nuk ka një datë për të, përcjell albinfo.ch.

“Nuk bëhet fjalë për një protestë, por për një vazhdë protestash. Diapazoni i protestës është shumë i madh. Do ta organizojmë protestën në një mënyrë shumë dimensionale. Nuk ka të bëjë me një individ, apo një proces brenda parlamentit, por ka të bëjë me familjen shqiptare. Do të jetë një nga protestat e mëdha, por nuk do të jetë një protestë që do të fillojë dhe do të mbarojë”, u shpreh Kryemadhi.

Ajo theksoi se Rama do të jetë së shpejti i pandehur i drejtësisë, për shkak se ka shkelur Kushtetutën para zgjedhjeve të qershorit të shkuar.

Ndërsa Basha pas takimit me e aleatët e opozitës deklaroi se ky do të jetë një viti i kurajos dhe përballjes, e fitores mbi të keqen.

“Ky është motivi që mban bashkë koalicionin opozitar dhe që udhëheq aksionin e nisur në fund të vitit të kaluar. Aksioni do të intensifikohet”, theksoi ai.