Kthehen edhe 114 shqiptarë, s’ka shanse për azil

Policia e Shtetit apelon edhe një herë për të gjithë shtetasit shqiptarë që udhëtojnë për në vendet e BE-së, të respektojnë rregullat e lëvizjes në hapësirën Schengen

Policia kufitare shqiptare ka bërë të ditur se ditën e sotme janë riatdhesuar 114 shtetas.

Sipas njoftimit të policisë, 28 persona janë deportuar nga Franca dhe pesë nga Belgjika, shkruajnë mediat shqiptare.

Ndërsa kishte edhe nga ata që kishin përfunduar dënimet në vendet e BE-së, apo që kishin tentuar të shkonin në Angli, përcjell albinfo.ch.

Njoftimi i plotë

Policia Kufitare vijon operacionet e përbashkëta të riatdhesimit të shtetasve shqiptarë, të cilët kërkojnë azil apo nuk respektojnë rregullat e qëndrimit në hapësirën SCHENGEN.                                                                                 Riatdhesohen 114 shtetas shqiptarë, të cilët kishin shkelur rregullat e qëndrimit në vendet e BE-së, apo u është refuzuar dhënia e azilit.

Në kuadër të fluturimeve të përbashkëta organizuar nga Franca në bashkëpunim me Frontex dhe me pjesëmarrjen e Belgjikës, Gjermanisë e vendeve të tjera të BE-së, si dhe me mbështetjen e eskortës Shqiptare në  Aeroportin e Rinasit mbërriti një charter nga Franca, i eskortuar nga Policia Shqiptare me 33 shtetas shqiptar, nga të cilët 28 shtetas të deportuar nga Franca dhe 5 shtetas nga Belgjika.

Po në këtë kuadër nga disa vende të BE-së, u riatdhesuan edhe 81 shtetas të tjerë shqiptarë të cilët kishin thyer rregullat e qëndrimit në hapësirën SCHENGEN, disa prej tyre kishin tentuar për të hyrë ilegal në Angli, si dhe një pjesë që kishin përfunduar dënimin në një nga vendet e BE-së.

Policia e Shtetit apelon edhe një herë për të gjithë shtetasit shqiptarë që udhëtojnë për në vendet e BE-së, të respektojnë rregullat e lëvizjes në hapësirën Schengen dhe të mos kërkojnë azil, pasi shanset për ta fituar janë zero.

---