Kujtohet Masakra e Lybeniqit: Nuk u kursyen as fëmijë e pleq

Lybeniq - Pejë

Presidentja e Kosovës, Vjosa Osmani, ka përkujtuar masakrën e fshatit Lybeniq të Pejës, që ndodhi 25 vjet më parë.

Ajo ka thënë se tendenca për shfarosjen e popullit shqiptar nuk i ka kursyer as fëmijët.

“25- vjet më parë regjimi gjenocidal i Serbisë, sikurse në shumë anë të Kosovës, dëshmoi barbarinë e tij, duke vrarë 79 civilë të fshatit Lybeniq. Tendenca për shfarosje të popullit shqiptar nuk kurseu as Muhametin 18-muajsh dhe Leonardin, 7-vjeçar”, është shprehur ajo.

Ajo shton se është obligim institucional që të mos ndalen së përpjekuri për vendosjen e drejtësisë për viktimat.

Më 25 maj të vitit 1998 në këtë fshat u vranë nëntë banorë, ndërsa më 1 prill të vitit 1999 u pushkatuan 72 të tjerë, në mesin e tyre gra shtatzëna, foshnja, fëmijë të mitur dhe burra të moshave të ndryshme dhe pleq.