Kumanovë: Qëllohet për vdekje “Komandant Shqiponja”

Është qëlluar për vdekje të enjten në Kumanovë pretendenti kryesor për kryetar dege të Bashkimit Demokratik për Integrim (BDI), Xhemail Rexhepi, i njohur me emrin e luftës “Komandat Shqiponja” ndërkaq dy shoqërues të tij mbetën të plagosur, ka raportuar portali zhurnal.mk.

Sipas këtij informacioni incidenti ka ndodhur rreth orës 15:30 në afërsi të kazermës  ushtarake në Kumanovë, ndërkaq Xhemail Rexhepi ka ndërruar jetë rrugës për në spital, kurse dy të plagosurit janë Shefki Rexhepi dhe Gani Demiri.

Gjithnjë sipas lajmit të zhurnal.mk, Xhemail Rexhepi është qëlluar nga përkrahës të Bajram Limanit, që para një muaji ishte emërua kryetar dege drejtpërdrejt nga kryetari i BDI-së, Ali Ahmeti.

Incidentin në Kumanovë e ka konfirmuar edhe Valentina Nikollovska e Ministrisë së Punëve të Brendshme të Maqedonisë, nëpërmes një prononcimi për shtyp.

“Gjatë përleshjes, në vendin e ngjarjes është vrarë Xhemail Rexhepi, i lindur më 1970, ndërsa ka mbetur i plagosur Shefki Rexhepi, i lindur më 1977, Sulmuesit që kanë qëlluar ndaj tyre janë larguar në drejtim të panjohur”, ka thënë ajo.