Kurti me videomesazh pas arrestimeve: Kam besim të plotë në ministren Hajdari

Albin Kurti

Kryeministri i Kosovës, Albin Kurti, u është drejtuar qytetarëve me një videomesazh pas arrestimeve në Ministrinë e Industrisë, Ndërmarrësisë dhe Tregtisë, pas dyshimeve për keqpërdorim të rezervave shtetërore.

“Qeveria jonë është e përgjegjshme dhe e drejtë. Kemi sjellë progres ekonomik dhe demokratik të paparë në Kosovën e pasluftës. Rezervat shtetërore i kemi gjetur 300 mijë euro, e i kemi bërë 25 milionë euro për dy vjet. 97% të vlerës së blerë vitin e kaluar ka mbërritur në Kosovë, përfshirë këtu 99,5% të sasisë së grurit që tashmë ndodhet në depo në vendin tonë, e për pjesën e mbetur, kompanitë furnizuese kanë obligim të hapur për ta përmbushur kontratën, dhe nëse nuk e bëjnë këtë, janë procedurat ligjore”, ka thënë Kurti, përcjell albinfo.ch.

Ai tutje ka shtuar se ka besim të plotë në ministren Rozeta Hajdari.

“Nuk ka kurrfarë korrupsioni e keqpërdorimi. Unë kam besim të plotë në Ministren Rozeta Hajdari dhe në punën e saj. Pas luftës në Ukrainë, kur kishte krizë globale, ministria që ajo drejton, i ka blerë rezervat dhe i ka mbushur depot në një kohë kur të gjithë kufijtë ishin mbyllur e pothuajse të gjitha shtetet kishin ndaluar eksportin”, u shpreh ai.

Kreu i Qeverisë së Kosovës po ashtu thotë se grupe të ndryshme po ngrenë të tilla akuza duke përmendur edhe mediat.

“Humbësit i gjeni tek elita e vjetër dhe e korruptuar politike, te gjykatës dhe prokurorë të saj, te mediat e keqpërdoruara pёr mbёshtetje tё krimit. Edhe pse tё paktё nё numёr, pёrfitimet e tyre kanё qenё shumëmilionёshe, andaj edhe nuk kanё se si mos tё ndihen humbës tё mëdhenj. Përpjekjet e tyre për ta ndryshuar situatën janë në shërbim të planit për ta kthyer ish-sistemin e kalbur e tё korruptuar”, tha Kurti, përcjell albinfo.ch.