Kurti nuk i shkon në takim Ramës

Përfundimisht, Qeveria e Kosovës e ka konfirmuar që kryeministri Albin Kurti nuk do të shkojë në takimin e ftuar nga kryeministri i Shqipërisë, Edi Rama, për liderët e Ballkanit.

Zëdhënësi i Qeverisë, Përparim Kryeziu, njofton se Kurti e ka konfirmuar muaj më parë pjesëmarrjen në një konferencë në Greqi.

“Para një jave Kryeministri i Kosovës, Albin Kurti, është ftuar nga Kryeministri i Shqipërisë, Edi Rama, për një drekë joformale me Komisionerin Evropian, Oliver Varhelyi, në Tiranë, e ku janë ftuar të marrin pjesë edhe kryeministrat e tjerë të Ballkanit Perëndimor. Kryeministri Kurti e ka njoftuar Kryeministrin Rama që nuk do të mund të shkojë kësaj radhe meqë muaj më parë e ka konfirmuar pjesëmarrjen në një konferencë në Kretë të Greqisë, e ku paneli për Ballkanin Perëndimor është saktësisht në ditën e njëjtë e në kohën e njëjtë”, përcjell albinfo.ch.

Tutje bëhet e ditur se Kurti do të marrë pjesë në Samitin e Procesit të Berlinit që do të mbahet në Tiranë, data e të cilit dihet: 16 tetor 2023.