Kurti për agjencinë italiane “AGI”: Po bëjmë çmos që sa më shpejt t’i afrohemi Bashkimit Evropian

Zyra e kryeministrit

Kryeministri i Kosovës, Albin Kurti, për agjencinë italiane “AGI” ka thënë se Kosova ka ende probleme në kufirin me Serbinë, teksa ka folur edhe për organizatat kriminale në veri të vendit.

“Fatkeqësisht ata që u pasuruan gjatë luftës janë kthyer në kriminelë dhe vazhdojnë të pasurohen me Bitcoin, drogë dhe armë. Ata e mbulojnë biznesin e tyre me ide nacionaliste, por janë ende kriminelë”, ka thënë ai, transmeton albinfo.ch.

Sa i përket aplikimit të Kosovës për anëtarësim në Bashkimin Evropian, ai ka thënë se po bëhet çmos për t’u afruar me BE-në.

“Nuk jemi ende zyrtarisht kandidat për anëtarësim, por po bëjmë çmos që sa më shpejt t’i afrohemi Bashkimit Evropian”, tha ai.

Tutje ai ka thënë se Lista Serbe ka lidhje me presidentin rus, Vladimir Putinin dhe atë të Serbisë, Aleksandar Vuçiq.

“Ata flasin për nacionalizëm dhe patriotizëm, por në realitet kanë ide fashiste dhe lidhje me Vuçiqin dhe Putinin”, tha ai.