Kurti: Për tre vjet, eksportet e Kosovës arritën në 2.5 miliardë euro

Kryeministri i Republikës së Kosovës, Albin Kurti, në Forumin Ekonomik në Zvicër, ku po bëhet promovimi i eksportit të bizneseve kosovare dhe atyre të Zvicrës, tha se progresi ka sjellë prosperitet ekonomik në Kosovë, përcjell albinfo.ch.

Sipas tij, treguesit ekonomikë nuk janë vetëm shifra, por tregues i vizionit ekonomik të vendit.

Ai ka përmendur rritjen e eksporteve të Kosovës, ku është bërë edhe rritje e tregut.

“Çdo gjë tregon se do të bëhemi një vendi i orientuar kah eksporti, nuk është e rastësishme që për dy vjet e gjysmë janë dyfishuar eksportet, ku në tre vjetët e fundit gjithsej vlera e eksporteve të Kosovës ka arritur në 2.5 miliardë euro. Ndërkaq kjo rritje është më shumë se dyfishi, krahasuar me gjashtë vjetët e mëparëshme”, tha Kurti.

Ai ka deklaroi se Kosova ofron shumë prodhime cilësore. Sipas tij, industria e mobilieve përfaqëson një gurthemel të strukturës ekonomike të Kosovës.

Shefi i ekzekutivit ka përmendur sistemin e arsimit dual që ndërlidhet me punë dhe praktikë. Kurti ka ftuar investitorët zviceranë të sjellin kapitalin në Kosovë.

Mbi 25 kompani po marrin pjesë në panairin e ndërtimit Swiss Bau 2024. 12 kompani nga industria e drurit po marrin pjesë me mbështetje të KIESA-s, ndërsa kompanitë e kllasterit, të cilat e kanë ndërtuar edhe shtëpinë e Kosovës nga druri për këtë panair, po marrin pjesë me mbështetje të USAID-it.