Kurti: Sulmi terrorist ishte pjesë e planit për aneksimin e Veriut

Kryeministri i Kosovës, Albin Kurti, shkruan se sulmi terrorist ishte plan i aneksimit të veriut të Kosovës.

“Në bazë të dokumentacionit të konfiskuar, Policia e Kosovës ka konfirmuar se sulmi terrorist ishte pjesë e një plani më të madh për të aneksuar veriun e Kosovës, nëpërmjet një sulmi të koordinuar në 37 pozicione të dallueshme. Do të pasonte krijimi i një korridori për në Serbi, për të mundësuar furnizimin me armë dhe me trupa”, ka deklaruar kryeministri Kurti.

Tetë ditë kanë kaluar nga sulmi terrorist ndaj Policisë së Kosovës në fshatin Banjskë të komunës së Zveçanit, ku mbeti i vrarë rreshteri Afrim Bunjaku.

Policia e Kosovës ka publikuar pamjet e sulmeve dhe konstatojnë se në bazë të materialeve të konfiskuara, ky ishte një plan aneksimi i veriut të Kosovës, përcjell albinfo.ch.