Kriza globale ekonomike ishte mësim se politikanët dhe biznesmenët duhet të punojnë së bashku për të arritur rezultate të prekshme, deklaroi zëvendëskryeministrja e Kosovës dhe njëherit Ministrja e Tregtisë dhe Industrisë, Mimoza Kusari-Lila. Ajo tha se Kosova i ka hapur dyert për investime.  

Këto deklarata zëvendëskryeministrja kosovare i bëri në konferencën e organizuar nga Iniciativa Ekonomike për Kosovë (ECIKS) me temë “Sfidat e Kosovës për zhvillimin e qëndrueshëm ekonomik” e cila po mbahet në Vjenë të Austrisë.

Sipas Kusari-Lilas, duhet t’u tregohet edhe qytetarëve se këto deklarata nuk janë fraza politike, por rezultatin në praktikë.

Në dhjetë vjetorin e ekzistimit të ECIKS-it, zëvendëskryeministrja dhe Ministrja e Tregtisë dhe Industrisë, Kusari-Lila foli për zhvillimin ekonomik në pesë vitet e fundit në Kosovë, ri-strukturimi i ndërmarrjeve publike, reformat e të bërit biznes dhe përkrahja e sektorit privat.
“Nuk do të ketë investime, nëse nuk ka qeveri kredibile dhe nuk do të ketë zhvillim të mirëfilltë të shtetit pa investime”, tha Kusari-Lila, sipas të cilës, Qeveria e Kosovës  është e vendosur për përmirësimin e ambientit për të bërë biznes.
 
Ajo tha se ndërmarrjet mund të operojnë me efikasitet dhe me një nivel minimal të pengesave rregullative.
 
“Qeveria e Republikës së Kosovës është e vetëdijshme se detyra e tanishme është të lëvizim nga qëndrueshmëria e thjeshtë në gjenerimin e punësimit dhe zhvillimin ekonomik”, deklaroi zëvendëskryeministrja Kusari – Lila.

Kjo konferencë është organizua me rastin e 10-vjetorit të themelimit të ECIKS, e cila ka shërbyer mbi 100 kompani kosovare dhe investitorë potencial, shumë prej të cilëve tashmë kanë investuar dhe gjenerojnë fitime në Kosovë.

Kusari-Lila foli para një paneli ku ishin të pranishëm: Erhard Busek, ish-zëvendëskancelar i Austrisë, zëvendësministrja e Ministrisë së Ekonomisë, Familjes dhe Rinisë së Austrisë, Bernadette Gileringer, ish-komisioneri i BE-së për Bujqësi, Franz Fischler si dhe drejtori e sektorit Privat të Agjencisë Austriake për Zhvillim Gunter Schall.