Lame: Shteti do të kthejë pronat e grabitura në bregdet

"Qeveria synon t’i japë fund këtij procesi të turpshëm dhe t’i rikthejë shtetit pronat e grabitura në këtë mënyrë"

“Të gjitha tokat bregdetare që i janë grabitur shtetit ndër vite do t’i rikthehen”, ka thënë kreu i ALUIZNI-t, Artan Lame, i cili bëri një deklaratë të ashpër lidhur me tokat në bregdet, duke paralajmëruar të gjithë qytetarët që janë të interesuar të blejnë të bëjnë kujdes.

Lame tha se qeveria po përgatit një skemë veprimi për zonat bregdetare, ku do kryhet vendimmarrja përgjatë vijës bregdetare, ndërsa do t’i nënshtrohen rivlerësimit 30 mijë parcela përgjatë gjithë bregdetit shqiptar. Ai deklaroi se tokat në bregdet janë ndarë duke u konsideruar si bujqësore. Sipas tij, qytetarët e interesuar duhet të tregohen të kujdesshëm në momentin që duan të blejnë prona në zonat bregdetare.

“Qeveria po përgatit skemë veprimi si nevojë për të sqaruar një pjesë mish mashi me pronat në zonat bregdetare të vendit, me atë pjesë që lidhet me ndarjen e këtyre zonave në mënyrë abuzive, apo AMTP-së. Qeveria synon t’i japë fund këtij procesi të turpshëm dhe t’i rikthejë shtetit pronat e grabitura në këtë mënyrë. Prona, që duke u rigrupuar do të ketë destinacion të qartë, përdorimin në procesin e kompensimit të ish-pronarëve dhe investimeve në turizëm. Nga ky fenomen zhvatjeje ka vuajtur e gjithë zona bregdetare e vendit”, theksoi  Lame.