Lejonin të kalonin kufirin ilegalisht, arrestohen dy punonjës të Policisë Kufitare

Ata akuzohen se kanë lejuar të kalonin kufirin shqiptarëve të cilëve u ishte ndaluar udhëtimi në zonën Shengen. Kjo bëhej kundrejt një shume që shkonte deri në 100 euro

Dy punonjës të Policisë Kufitare të Shqipërisë janë arrestuar pasi akuzohen se kanë lejuar të kalonin kufirin shqiptarëve të cilëve u ishte ndaluar udhëtimi në zonën Shengen. Kjo bëhej kundrejt një shume që shkonte deri në 100 euro, shkruajnë mediat shqiptare.

Të arrestuarit nga Shërbimi për Çështjet e Brendshme dhe Ankesat (SHÇBA) në bashkëpunim me Prokurorinë e Rrethit Gjyqësor Shkodër janë Luan Xheka, me detyrë ndihmës kontrollor PKKK Muriqan, dhe Bardhok Preçi, Përgjegjës turni, në Stacionin e Policisë Kufitare në Shëngjin, përcjell albinfo.ch.

“Hetimet kanë dokumentuar se kundrejt pagesave që shkonin deri në 100 euro, këta punonjës policie duke shpërdoruar detyrën, lejonin kalimin në pikën kufitare të shtetasve shqiptarë që u ishte ndaluar udhëtimi në zonën Shengen, si dhe regjistronin e vulosnin fiktivisht pasaportat e shtetasve të ndryshëm për të evituar shkeljen e afatit të qëndrimit në zonën Shengen”, informoi zyra e shtypit e Ministrisë së Brendshme.

Ata akuzohen për veprën penale të “Shpërdorimit të detyrës” dhe Gjykata kishte vendosur për ta “Arrest në burg”.