Liberalizimi i vizave ndal migrimin ilegal

Kosova nuk duhet të mbetet vend i vetëm i izoluar, dhe liberalizimi i shpejtë i vizave e ndalë edhe migrimin ilegal, thotë ministri i Brendshëm, Skënder Hyseni

Ambasadorët e shteteve anëtare të Bashkimit Evropian iu kanë bërë thirrje qytetarëve të Kosovës që mos të migrojnë ilegalisht në BE sepse nuk ka azil për ta. Ata kanë deklaruar të mërkurën në Prishtinë se BE nuk do t’iu ofrojë strehim kosovarëve e  rrjedhimisht do të kthehen të gjithë.

Këtë mesazh diplomatët e BE-së të akredituar në Kosovë e lëshuan pas një takimi që zhvilluan me ministrin e Punëve të Brendshme, Skender Hyseni. Ky i fundit tha se liberalizimi i vizave vë në kontroll dhe e ndalë migrimin ilegal.

Hyseni i ftuar nga shefi i zyrës së BE-së, Samuel Zhbogar, bëri një prezantim para ambasadorëve të BE-së rreth migrimit ilegal, ekstremizmit të dhunshëm, si dhe u përgjigj në interesimin e ambasadorëve rreth protestave të fundit, që çuan në dorëheqje ministrin për Kthim dhe Komunitete Aleksandar Jabllanoviq.

Ministri Hyseni theksoi se janë shkaqet ekonomike, mbi të gjitha, që bëjnë një numër të madh të qytetarëve të marrin një rrugë pa krye.

“Janë kriminelët që përfitojnë mbi fatkeqësinë e qytetarëve të Kosovës”, theksoi ministri Hyseni, duke i bërë thirrje vendeve anëtare të BE-së që të shkurtojnë procedurat e shqyrtimit të kërkesave të qytetarëve të Kosovës. Ai po ashtu tha se Qeveria e Kosovës do të adresojë shkaqet e migrimit, ministri Hyseni nënvizoi se

“Kosova nuk duhet të mbetet vend i vetëm i izoluar, dhe liberalizimi i shpejtë i vizave është në dobi të qytetarëve të Republikës së Kosovës dhe shteteve të Bashkimit Evropian të cilat po përballen me fluks të madh të migrimit të kosovarëve”, deklaroi mes tjerash ministri i Brendshëm.