Lihtenshtajni shqyrton anëtarësimin në BE

Kryetarja e Qeverisë së Lihtenshtajnit, Brigitte Haas, ka bërë të ditur se vendi i saj ka nisur një proces reflektimi të thellë për mundësinë e anëtarësimit në Bashkimin Evropian. Sipas saj, është krijuar tashmë një grup pune, i cili do të shqyrtojë të gjitha opsionet për integrimin e mëtejshëm evropian të principatës, shkruan RTS, transmeton albinfo.ch.

“Po shqyrtojmë të gjitha opsionet pa asnjë dyshim,” deklaroi Haas, duke e pranuar se anëtarësimi në BE do të ishte një hap i madh për vendin me vetëm 40 mijë banorë. “E kam të vështirë ta imagjinoj për momentin, por kjo është arsyeja pse duhet të përgatitemi. Të kemi qartësi se cilat janë mundësitë për të qenë dhe për të mbetur të integruar në Evropë.”

Lihtenshtajni është tashmë pjesë e disa organizmave ndërkombëtarë dhe bashkëpunimeve rajonale, përfshirë Zonën Ekonomike Evropiane (EEA), Këshillin e Evropës, OKB-në, OBT-në dhe FMN-në. Edhe pse nuk është anëtar i BE-së, principata zbaton në mënyrë të vullnetshme sanksionet evropiane dhe kontribuon në ndihmat humanitare globale, përfshirë strehimin e rreth 800 refugjatëve nga Ukraina – një numër i konsiderueshëm për përmasat e saj, transmeton albinfo.ch.

Në fjalën e saj, Haas nënvizoi edhe qasjen e vendit të saj në fushën e sigurisë. “Lihtenshtajni nuk ka ushtri, por mbrojtja jonë bazohet në solidaritet dhe partneritet të besueshëm në zemër të Evropës,” theksoi ajo. Vendit i mungon një ushtri tradicionale, por ai gëzon marrëdhënie të ngushta bashkëpunimi me Zvicrën, Austrinë dhe Gjermaninë, sidomos në fushat e punëve të brendshme dhe të jashtme.

Përveç çështjeve të mëdha gjeopolitike, kryeministrja foli edhe për nevojën e përmirësimit të transportit publik ndërkufitar. Ajo propozoi krijimin e një komuniteti tarifor të përbashkët mes Lihtenshtajnit, Zvicrës dhe rajonit të Vorarlbergut në Austri. “Një rajon, një biletë – ky do të ishte qëllimi”, tha Haas, duke iu referuar mbingarkesës së përditshme me të cilën përballen udhëtarët në kufijtë e principatës, transmeton albinfo.ch.