Kosova

Lirohen gjashtë të dyshuar në rastin “Brezovica”, paguajnë 190 mijë euro dorëzani

E premte, 1 Shtator 2023 - 19:40 albinfo.ch

Gjykata Themelore në Ferizaj ka liruar gjashtë persona të dyshuar në rastin “Brezovica”, pasi kanë paguar dorëzaninë. Të pandehurit, të nacionalitetit serb, kanë paguar në total 190 mijë euro dorëzani dhe do të mbrohen në liri.

Sipas vendimit të gjykatës, i pandehuri me inicialet B.N. ka paguar 50 mijë euro, D.R. 30 mijë euro, D.M. 20 mijë euro, S.M. 30 mijë euro, S.S. 30 mijë euro dhe J.K. 30 mijë euro.

“Nëse të pandehurit e lartcekur, nuk i përgjigjen thirrjeve të Gjykatës, mjetet e caktuara si dorëzani do të derdhen në fondin për kompensimin e viktimave të krimit, ndërsa të pandehurve do t’iu caktohet menjëherë masa e paraburgimit”, thuhet në vendimin e Gjykatës.

Ndryshe, ata ishin arrestuar vitin e kaluar në rastin e njohur si “Brezovica 1”, nën dyshimet për dallavere me leje ndërtimore në Brezovicë.