Lista Serbe nuk do të lejojë udhëheqjen e komunave veriore nga shqiptarët

Albinfo

Nënkryetari i Listës Serbe, Millan Radoiçiq, i cili është në kërkim nga Policia e Kosovës dhe në listën e zezë të Shteteve të Bashkuara të Amerikës, ka reaguar pas zgjedhjeve të 23 prillit në komunat veriore.

Ai u shpreh se populli serb në Kosovë “nuk do të lejojë kurrë” që komunat me shumicë serbe në veri të vendit të udhëhiqen nga ata që kanë fituar “1 apo 2 për qind të votave” në zgjedhje, shkruan Radio Evropa e Lirë.

Radoiçiq nuk tregoi se çfarë masash mund të ndërmerren, përcjell albinfo.ch.

Të dielën u mbajtën zgjedhjet lokale për kryetar të komunave në Mitrovicë të Veriut, Zubin Potok, Zveçan dhe Leposaviq.

Radoiçiq u shpreh se të gjithë serbët e kuptuan mesazhin. “Është në dorën tonë që së bashku me vendin tonë, Serbinë, dhe me presidentin Aleksandar Vuçiq ta vazhdojmë luftën për të ruajtur paqen dhe të drejtën e serbëve për të jetuar jetën e tyre”, tha Radoiçiq, shkruan REL.

Serbët bojkotuan në masë të madhe nga 45095 qytetarë me të drejtë vote, votuan vetëm 1567 prej tyre, përcjell albinfo.ch.

Nga këto zgjedhje, Mitrovicën e Veriut dhe Leposaviqin e fitoi Lëvizja Vetëvendosje dhe Zveçanin e Zubin Potokun, Partia Demokratike e Kosovës.