LSDM nuk e përjashton koalicionin me BDI-në

Por, LSDM mbetet optimist se BDI kësaj here do të ndëshkohet nga qytetarët shqiptarë, pas koalicionit disavjeçar me VMRO DPMNE-në

Partia më e madhe e opozitës maqedonase e cila në zgjedhjet e 11 dhjetorit hyn me shumë entuziazëm, nuk e përjashton mundësinë që pas zgjedhjeve të bëj koalicion me partinë e Ali Ahmetit- Bashkimin Demokratik për Integrim (BDI). Por, LSDM mbetet optimist se BDI kësaj here do të ndëshkohet nga qytetarët shqiptarë.

Anëtari i lartë i LSDM-së, Muhamed Zekiri në intervistën për REL është pyetur se a është i mundur një koalicion i LSDM me BDI pas zgjedhjeve. Ai tha se LSDM nuk mund të jetë kundër vullnetit të votuesve, në qoftë se ata sërish i japin besimin BDI-së.

“Por unë nuk besoj dhe nuk dua të besoj se shqiptarët, pas gjithë kësaj që po ndodh, pasi po e shohin se në çfarë mënyrë ka qeverisur BDI, se përsëri do të vendosin që të votojnë këtë parti”, tha Muhamed Zeqiri, sipas të cilit, i mbetet qytetarëve që t’i japin besimin BDI-së. “Kjo nuk është çështje e LSDM-së”, deklaroi Zekiri, i cili është ndër pak shqiptarë në kryesinë e LSDM-së që drejtohet nga Zoran Zaev.