LSI-ja thotë se Rama e Kumbaro po gënjejnë për projektin e Teatrit

Sipas tij, deklarata e djeshme e ministres së Kulturës, Mirela Kumbaro, nxori gënjeshtar dhe mashtrues kryeministrin Rama

Kreu i grupit parlamentar të LSI-së, Petrit Vasili, ka reaguar ndaj kryeministrit Edi Rama dhe ministres Mirela Kumbaro duke thënë se ata po  gënjejnë për projektin e Teatrit Kombëtar.

Sipas tij, deklarata e djeshme e ministres së Kulturës, Mirela Kumbaro, nxori gënjeshtar dhe mashtrues kryeministrin Rama, përcjell albinfo.ch.

Vasili shkruan se kryeministri i Shqipërisë kërkon zhbërje të çdo gjurme të historisë e të çdo vlere kulturore të krijuar me mund të madh në dhjetëra vite.

Ai tregon se ky është kompleksi i padijes pa shërim i një kryeministri dhe një fakt të tillë as topi nuk e lëviz.

“Kryeministri përpara artisteve të Teatrit Kombëtar, me vulgaritetin e tij të shënjuar e pjellë të një padije të shumanshme, i shtrëngoi ata të shihnin e dëgjonin projektin e ri të Teatrit Kombëtar. Projekti na ishte produkti një studioje emërmadhe BIG i thoshin dhe arkitekti quhej Biarke Ingels. Ti lëmë mënjanë komentet e këtij projekti se që është një sipërmarrje vlerëshkatërruese këtë s’e luan as topi. Edhe që është ajo toke ku rri sot teatri kombëtar një lopë e madhe, që prodhon shumë para, të lara e të shpëlara edhe këtë topi s’e luan. Edhe që zhbërja e çdo gjurmë të historisë e të çdo vlere kulturore të krijuar me mund të madh në dhjetëra vite, nga ky kryeministër viktimë e kompleksit të padijes pa shërim edhe këtë as topi nuk e lëviz”, ka shkruar ai.