Forca të mëdha të njësive speciale të xhandarmërisë serbe kanë mbërritur në komunën e Preshevës, për të hequr lapidarin e dëshmorëve të ish-Ushtrisë Çlirimtare për Preshevë, Medvegjë dhe Bujanoc (UÇPMB). Siç raportojnë mediet serbe, “gjithçka është gati për ta ekzekutuar lapidarin”.

Sipas informatave nga Lugina e Preshevës, pesë autobus vetëm mbrëmë kanë arritur në bazën e policë në “Çakanoc”, ndërsa edhe një kontingjent tjetër ka ardhur para dy-tri ditëve.

Sipas burimeve të “albinfo.ch”, forca të mëdha xhandarmërisë janë pozicionuar edhe në brezin kufitar me Kosovën, respektivisht në afërsi të fshatit Dobrosin dhe Breznicë. Por forca të shkuara ka edhe në fshatrat e Karadakut të Preshevës.  

“Gjithçka është absolutisht gati që të aprovohet vendimi i shtetit. Mirëpo, skenari i vet aksionit mbahet në fshehtësi, andaj vetëm drejtuesit më të lartë të shtetit e dinë se në çfarë mënyre do të vij deri tek operacion”, citojnë mediat serbe një burim të MPB-së në Beograd.

Ndryshe, të enjten ka kaluar ultimatumi i kryeministri të Serbisë, Ivica Daçiq për heqjen me “dëshirë” të lapidarit, në të kundërtën ai ka thënë se shteti e heq dhunshëm.

Mirëpo këshilltarët shqiptarë të Luginës së Preshevës kanë deklaruar se lapidarin e dëshmorëve nuk do ta heqin. Madje me një vendim komunal, ata e kanë legalizuar, duke u thirrur në Ligjin e Administrimit Komunal të Serbisë.

Zëvendëskryeministri i Serbisë dhe njëherit ministri i Mbrojtjes, Aleksandar Vuçiq ka thënë se në territorin e Preshevës do të respektohen ligjet e Serbisë, ndërsa organet kompetente do të veprojnë me urgjencë në një afat sa më të shkurtë për ta larguar përmendoren.

“Në territorin e Preshevës do të respektohet ligji i Serbisë, dhe organet kompetente do të veprojnë me afat sa më të shpejtë”, ka thënë Vuçiq raporton “presheva.com”.

Lapidari i vendosur në oborrin e Komunës së Preshevës përkujton dëshmorët e UÇPMB-së, një strukturë guerile shqiptare që ka luftuar kundër regjimit të Millosheviqit në vitin 2000-2001.

Qeveria e Serbisë, e cili drejtohet nga pasardhësi i Millsheviqit, Ivica Daçiq, UÇPMB-në e konsideron forcë terroriste, edhe pse ajo ishte amnistuar nga Kuvendi i Serbisë me një ligj të veçantë.