Majlinda Kelmendi, medalja e artë e Evropës

Xhudistja pejane, Majlinda Kelmendi e mposhti në finale francezen Priscilla Gneto, për t’u kurorëzuar me medaljen e artë. Xhudistja tjetër, Nora Gjakova e ka fituar medaljen e bronztë

Xhudistja kosovare Majlinda Kelmendi ka shkëlqyer sërish në Kampionatin Evropian të Xhudos që po mbahet në Kazan të Rusisë. Ajo sot ka fituar medaljen e artë, duke bërë që para flamurit të Republikës së Kosovës të bëjnë nderë të gjithë të pranishmit në këtë  kampionat.

Xhudistja pejane e mposhti në finale francezen Priscilla Gneto, për t’u kurorëzuar me medaljen e artë. Kampionia e botës e kaloi xhiron e parë pa luftë, kurse në atë të dytë e mundi ukrainasen Oleksandra Starkova, raporton Zëri. Kurse, në rrethin e tretë, pejania ishte më e mirë se izraelitja Roni Schwartz, për ta fituar grupin dhe për të shkuar në gjysmëfinale, ku e mundi francezen Euranie Annabelle, para se ta fitonte edhe finalen ndaj francezes tjetër, Gneto.

Ndërkaq, xhudistja tjetër, Nora Gjakova e cila ka luftuar në kategorinë 57 kilogramë, e ka fituar medaljen e bronztë, duke  ebërër po ashtu krenarë Kosovën. Gjakova në luftën për të bronztën e mposhti britaniken Nekoda Davis Smythe, për ta arritur rezultatin sensacional.

Ajo e fitoi meçin e parë ndaj ruses Daria Mezhetckaia, ndërsa në rrethin e dytë ishte më e mirë se austriakja Sabrina Filzmoser. Në xhiron e tretë ajo e mundi edhe izraeliten Timna Levy Nelson, kurse në gjysmëfinale u mund nga bullgarja Ivelina Ilieva.