Makolli: Të rishikohet strategjia për regjistrimin e diasporës

Nuk duhet të rishikohet procesi si tërësi, por vetëm strategjia për regjistrimin e diasporës, ka deklaruar ish ministri i Diasporës, Ibrahim Makolli

Ish-ministri i Diasporës, Ibrahim Makolli kërkon që regjistrimi i diasporës të vazhdoj deri në fund, ndërsa e konsideron të nevojshme që të rishikohet Strategjia për regjistrimin e Diasporës. Ai thotë se nuk duhet të rishikohet procesi si tërësi, por vetëm strategjia sepse regjistrimi si i tillë, sipas Makollit, ka rëndësi të veçantë për Kosovë.

“Procesi i regjistrimit të diasporës duhet të jetë interes i përgjithshëm dhe të shikohet si projekt kombëtar. Rishikimi i strategjisë për regjistrimin e diasporës është i nevojshëm, por jo procesi i tërësishëm. Natyrisht se ka nevojë të rishikohet strategjia gati për çdo muaj në mënyrë që të jetë efikase”, ka deklaruar Makolli.

Ai ka thënë se sa ishte ministër i Diasporës ka punuar mjaft, por që në procesin e regjistrimit të diasporës ka pasur efekt edhe bllokada politike e vitit të kaluar.

“Kemi bërë aq sa na kanë lejuar rrethanat e një viti zgjedhor. Mendoj se sa i përket angazhimit dhe çështjeve të tjera nuk kam pasur asnjë hezitim në këtë drejtim. Por, natyrisht jam i bindur se edhe viti zgjedhor ka pasur efektin e vet”, ka vlerësuar Makolli për Epoka e re.

Në këtë kontekst, ai ka deklaruar se ky proces duhet të vazhdojë sepse është në interes të përgjithshëm të shtetit të Kosovës.

“Është proces i cili duhet të vazhdojë sepse është në interes të përgjithshëm të shtetit të Kosovës. Mendoj se procesi i regjistrimit të diasporës do të jetë i suksesshëm. Sa do të jetë kohëzgjatja e tij është çështje tjetër, por fundi i tij do të sjellë rezultate pozitive. Prandaj, nuk dyshoj aspak në suksesin përfundimtar të procesit të regjistrimit”, është shprehur Makolli.

Makolli ka thënë se të gjithë i kanë borxh mërgatës, e cila ka dhënë kontribut të veçantë në periudha të ndryshme për Kosovën.

“Kësaj kategorie të gjithë ne i kemi borxh të madh. Është edhe në interes të mërgatës dhe institucioneve të Kosovës të ketë një bashkëveprim. Në këtë drejtim dua të besoj se do të vazhdojë bashkëpunimi i të gjitha veprimeve të përbashkëta në raport me mërgatën dhe jo vetëm Ministria e Diasporës, por edhe institucionet e tjera duhet ta kenë këtë parasysh”, ka thënë ai.