Mali nuk e ka njohur Kosovën

Përfaqësuesit e Malit në OKB kanë deklaruar, se nuk e kanë njohur Kosovën. Pacolli insiston që nota verbale është origjinale

Paqartësitë që janë krijuar së fundi nëse Republika e Kosovës është njohur si shtet sovran nga Republika afrikane e Malit, janë zgjidhur të shtunën mbrëma. Përfaqësuesit e Malit në Kombet e Bashkuara kanë deklaruar për mediet kosovare, se nuk e kanë njohur Kosovën e pavarur.

Ndërsa njeri i cili proklamoi njohjen, zëvendëskryeministri Behgjet Pacolli ka shkuar sërish në “kontinentin e zi” për të vërtetuar autorësinë e notës verbale që ka ardhur nag Mali.

“Duam t’ju njoftojmë se Republika e Malit nuk e ka njohur Kosovën si shtet të pavarur”, kanë thënë zyrtarë i këtij misioni për gazetën “Express” e Prishtinës. Në Mali është gjendje grusht shteti, pasi presidenti Dioncounda Traore, i cili sipas Pacollit, e ka nënshkruar njohjen, është rrëzuar nga pushteti.

Megjithatë Pacolli insiston që nota verbale është origjinale, ndërsa për të kuptuar pse ka ardhur deri te ky konfuzion, thotë se është nisur për të takuar pikërisht presidentin e

Malit, Traore. “Gjendem këtu në aeroportin e Accra’s dhe po pres përgjigjen e presidentit Traore”, ka thënë Pacolli për gazetën “Zëri”.

Ndërkaq për këto paqartësi që janë krijuar në fushën e njohjeve dhe në përgjithësi në domenin dioplomatik, ka reaguar partia më e fuqishme opozitare, Lidhja Demokratike e Kosovës.“Kjo sjellje e Qeverisë së Kosovës është një manipulim i ulët me opinionin publik duke i servuar informata konfuze dhe të pakonfirmuara”, konsideron LDK .

Veprimet e tilla, sipas LDK-së, dëmtojnë rëndë raportet bilaterale mes të Republikës së Kosovës dhe Republikës së Malit.

“Për më tepër, kjo sjellje dëmton rëndë edhe imazhin e Ministrisë së Punëve të Jashtme dhe të Kosovës, në përgjithësi dhe dëshmon edhe një herë çakordimin e Qeverisë për sa i përket politikës së jashtme të Kosovës”, thuhet në reagimin e LDK-së.