Mantelbardhët mësojnë gjermanishten për të ikur nga Maqedonia

Gjithnjë e më tepër mjekët dhe infermierët nga Maqedonia po emigrojnë drejt vendeve evropiane për një punë që do t'u sigurojë më shumë të ardhura.

Pas diplomimit, mjekët regjistrohen nëpër kurse të gjermanishtes, për të ikur jashtë vendit.

Sipas Shoqatës së mjekëve shqiptarë në Maqedoni, dukuria është më e theksuar në rajonin e Tetovës.

Në dhjetë vjetët e fundit është rritur numri i mjekëve, të cilët kërkojnë vërtetime nga Oda e Mjekëve, se në mënyrë aktive merren me mjekësi klinike. Në vitin 2015 ky numër arriti në 171. Nuk dihet nëse këta mjekë janë kthyer në Maqedoni apo jo.

Ndërkaq, nënkryetarja e Odës së mjekëve, Lençe Nelovska, thotë për Alsat-M se ”vërtetimi i njëjtë vlen edhe për njerëzit që planifikojnë të shpërngulen, por ne si Odë as që kemi të drejtë, e as që kërkojmë të dhëna për atë nëse mjekët shkojnë dhe kthehen, apo nuk kthehen fare”, përcjell albinfo.ch.