Maqedonci: Aksidenti në Turqi ndodhi në kazermën ku stërviten edhe pjesëtarët e FSK-së

Foto sc "X": @anadoluajansi

Ministri i Mbrojtjes i Kosovës, Ejup Maqedonci, është shprehur i tronditur pas përplasjes së helikopterëve ushtarakë në Turqi, si pasojë e të cilës kanë vdekur gjashtë persona.

Përmes një postimi në rrjetin social “Facebook”, ai ka deklaruar se pjesëtarët e FSK-së që janë atje duke ndjekur trajnimet kanë qenë larg vendit të ngjarjes dhe janë mirë e të sigurt.

“Jashtëzakonisht i tronditur me lajmin e sotëm rreth aksidentit ajror me fatalitet që ka ndodhur në regjionin në Isparta, ku Komanda e Shkollës së Aviacionit Tokësor të Ushtrisë Turke kryen trajnimet. Shpreh ngushëllimet e mia më të sinqerta autoriteteve shtetërore turke, ministrit Yaşar Güler, Forcave të Armatosura Turke dhe familjarëve të ushtarakëve të vdekur. Fatmirësisht, pjesëtarët e FSK-së, të cilët aktualisht janë duke ndjekur trajnimet në këtë kazermë kanë qenë larg vendit të incidentit dhe janë mirë e të sigurt. Në këto momente të vështira ndajmë dhimbjen me popullin turk. Qoftë i paharruar kujtimi për martirët!”, ka shkruar ai, transmeton albinfo.ch.