Maqedoni e Veriut: 101 raste të reja me koronavirus

KEYSTONE/ EPA/GEORGI LICOVSKI

Në Maqedoni të Veriut është rritur dukshëm numri i të infektuarve me Covid-19. Vetëm gjatë 24 orëve të fundit nga 974 teste për Covid-19, 101 persona kanë rezultuar pozitivë.

Më shumë se gjysma, respektivisht 59 janë regjistruar në Shkup, 12 në Kumanovë dhe rrethinë. Shifrat e sotme vendin e rikthejnë në fillim të prillit, kur u shënua shpërthimi i parë i virusit dhe numri më i lartë i të infektuarve në vend që nga fillimi i pandemisë.  Kurba e të infektuarve sot është 11.74%.

Nga dikasteri i Shëndetësisë informuan edhe për 4 të vdekur të moshës 58 deri 84 vjeç. Që nga fillimi i pandemisë, 145 kanë ndërruar jetë, 1605 janë shëruar, ndërsa 742 raste vazhdojnë të jenë aktive. Shkupi, Tetova, Kumanova  dhe Shtipi janë qytetet me numrin më të lartë të rasteve aktive. Shifrat e sotme përforcojnë edhe më shumë mundësinë për rikthim të masave shtrënguese, ashtu siç edhe ka paralajmëruar ministri i Shëndetësisë.

Organizata Botërore e Shëndetësisë ka kategorizuar qytetet më të rrezikuara nga virusi korona në Maqedoninë e Veriut. Shkupi, si kryeqytet, gjendet në fazën e katër që nënkupton përhapje të gjerë, të palokalizuar. Në fazë të njëjtë ndodhet edhe Tetova, por sipas konstatimeve përhapja është e lokalizuar. Në Shtip thuhet se shpërndarja është në fazën kritike, por është e kontrolluar dhe lokalizuar. Gjatë 24 orëve, 392 personave u është dhënë vendim për izolim dhe 150 persona kanë nënshkruar deklarata për vetizolim, përcjell Albinfo.ch.