Maqedoni: Ligji i gjuhëve, manipulim me ndjenjat

Partia më e madhe opozitare në Maqedoni, VMRO DPMNE, insiston në zgjedhje të parakohshme parlamentare, bashkë me ato presidencialet.

Kryetari i kësaj partie, Hristijan Mickoski, në një debat me redaktorët e pesë televizioneve kombëtare në Maqedoni, akuzoi pushtetin se përgatitet për të manipuluar zgjedhjet presidenciale. Për këtë arsye, Mickoski kërkoi formimin e Qeverisë teknike, me ministër të Brendshëm dhe disa zv.ministra, të cilët do t’i takonin VMRO DPMNE-së. përcjell albinfo.ch

Mickoski tha se miratimi i Ligjit për gjuhët është manipulim me ndjenjat e qytetarëve shqiptarë në prag të zgjedhjeve presidenciale. “Mbes në qëndrimin se nuk kam kundër që bashkësitë etnike në Maqedoni të shfrytëzojnë të drejtën të artikulojnë dhe të flasin në gjuhën amtare që është i ndryshëm nga maqedonishtja. Ajo duhet të bëhet në mënyrë ligjore dhe kushtetuese, jo sikur është bërë tash. Qëllimi nuk ishte i sinqertë, qëllimi ishte të manipulohet me votat e shqiptarëve para zgjedhjeve”, ka thënë ai.