Maqedoni: Në 5 vitet e fundit nga vendi ikën 60 mijë të rinj

Albert Hyseni's

Trendit të vazhdueshëm të shpërnguljes së të rinjve nga Maqedonia e Veriut i shtohet edhe shqetësimi për përfshirjen e tyre të kufizuar në jetën shoqërore dhe institucionale.

Sipas Aleksandar Nikollovskit, kryetar i Kuvendit Studentor Universitar, mungesa e përfaqësimit të të rinjve në vendimmarrje është një faktor kyç në vendimin e tyre për të emigruar. Ai thekson nevojën për forcimin e strukturave rinore dhe për zbatimin efektiv të Ligjit për Pjesëmarrjen Rinore, i cili parashikon ngritjen e këshillave lokale dhe të Kuvendit Kombëtar Rinor, transmeton Alsat, përcjell albinfo.ch.

“Nëse të rinjtë vazhdojnë të injorohen dhe interesat partiake vendosen mbi ato shoqërore, numri i të larguarve mund të dyfishohet në vitet e ardhshme”, deklaroi Nikollovski.

Nga ana tjetër, Ivan Peshevski, nënkryetar i Lidhjes së Sindikatave të Maqedonisë, thekson faktorët ekonomikë si arsye kryesore për emigrimin. Ai përmend pagat e ulëta, kushtet e këqija të punës, mungesën e kontratave të rregullta dhe cilësinë e dobët të shërbimeve publike, veçanërisht në shëndetësi dhe arsim.

“Pagat e ulëta dhe punësimi joformal janë ndër shkaqet kryesore që i shtyjnë të rinjtë — dhe tërë familjet — të largohen”, tha Peshevski.

Të dhënat zyrtare tregojnë se gjatë pesë viteve të fundit nga vendi janë larguar rreth 60 000 të rinj, ndërsa hulumtimet sugjerojnë se çdo vit 10% e studentëve zgjedhin të ndjekin studimet jashtë vendit, kryesisht në shtetet e Bashkimit Evropian