Maqedoni: Pjesëmarrje e “kënaqshme” në votime

Pjesëmarrje më e lartë në votime, sipas KSHZ-së, është regjistruar në njësinë e 3 dhe të 1, ku numri i votuesve ka arritur në 38 për qind, ndërsa më së paku kanë dalë në zonën e 6 rreth 24 për qind

Komisioni Shtetëror i Zgjedhjeve ka njoftuar se deri në orën 13, dalja në votime ka qenë relativisht e kënaqshme duke shkuar mbi 30 për qind. Pjesëmarrje më e lartë, sipas KSHZ-së, është regjistruar në njësinë e 3-ë dhe të 1-ë, ku numri i votuesve shkon në 38 për qind, ndërsa më së paku kanë dalë në zonën e 6 rreth 24 për qind.

Sipas Komisionit Shtetëror Zgjedhor, dalja e votuesve deri në ora 13:0, në nivel vendi ishte 34.53 për qind.

Njësia zgjedhore numër 1 kanë dalë 38.35%, në Njësia zgjedhore numër 2: 33,67%; në

Njësinë zgjedhore numër 3: 38.67%; në Njësinë zgjedhore numër 4: 39,28% votues; në Njësinë zgjedhore numër 5: 33.55% dhe; në Njësinë zgjedhore numër 6: kanë dalë 24,03% e votuesve.

Kryetari i KSHZ-së, Aleksandar Çiçakovski, ka thënë se procesi zgjedhor kryesisht po zhvillohet në atmosferë të qetë dhe demokratike. Sipas tij, ka pasur disa ankesa nga qytetarë që nuk kanë mundur të gjejnë emrat e tyre në regjistrat zgjedhore, ankesa këto që do të shqyrtohen sa më shpejt që të jetë e mundur që edhe ata të realizojnë të drejtën e votës.

Të drejtë vote në këtë zgjedhje kanë rreth 1.8 milion banorë të Maqedonisë, të cilët duhet të zgjedhin përbërjen e re parlamentare prej 120 deputetësh.

Në garë për mandate janë 11 lista të partive dhe koalicioneve partiake, katër prej të cilave janë të subjekteve politike shqiptare. Beteja kryesore zhvillohet mes VMRO DPMNE-së, LSDM-së, BDI-së, PDSH-së, Lëvizjes Besa dhe Aleancës për Shqiptarët.

Zgjedhjet mbahen sipas sistemit proporcional me lista të mbyllura dhe ato po zhvillohen në gjashtë njësi zgjedhore ku çdonjëra prej tyre nxjerr nga 20 deputetë.