Maqedoni, rriten shpenzimet e jetës

Sipas Entit të Statistikave, rritje janë shënuar kryesisht në shpenzimet komunale dhe derivatet

Enti Shtetëror për Statistika në Maqedoni tregon për rritje të shpenzimeve të jetesës për 0.2 për qind nga muaji gusht në muajin shtator, ndërsa 1.6 për qind krahasuar me periudhën e njëjtë të vitit të kaluar.

Sipas këtij enti, harxhimet janë shtuar kryesisht në shpenzimet komunale dhe derivatet.

Analizuar sipas grupeve kryesore, sipas konsumit, në shtator vërehet rritje e çmimeve në shëndetësi për 6,4 për qind, banim, ujë, energji elektrike, gaz dhe karburante tjera për 1,2 për qind, transport për 0,9 për qind, etj, raporton INA.

Zvogëlim të harxhimeve të jetesës është shënuar në grupet “mobile dhe orendi” për 8 për qind dhe “ushqim dhe pije alkoolike” për 0,7 për qind.

Ndryshe, Maqedonia së bashkë me Kosovën janë të parat në Evropë për numrin e të papunëve. Autoritetet në Maqedoni kanë konfirmuar se numri i qytetarëve të evidentuar si të papunë ka arritur rreth 350 mijë persona. Nga ky numër 57 për qind e të papunëve janë prej 18 deri 27 vjeç.